Jafnvægi komið á vatnsbúskap
Akureyri. Mynd: Hörður Geirsson.
Ágætt jafnvægi er nú komið á vatnsbúskap vatnsveitu Norðurorku á Akureyri og ástandið þokkalegt á Svalbarðsströnd. Eins og fram hefur komið í fréttum brugðust notendur á Akureyri mjög skjótt við þegar þeir voru í síðustu viku beðnir um að spara kalda vatnið þar sem birgðastaða í miðlunargeymum fór niður fyrir öryggismörk. Fram kemur á vef Norðurorku að eins og staðan er í dag þá er ekki ástæða til þess að óttast vatnsskort, en þó ber að hafa í huga að vatnsgæfni aðal vatnslinda Norðurorku í Hlíðarfjalli (Hesjuvallalindir) og í Glerárdal (Sellandslindir) er mun minni en í meðalári.
Því er þeim tilmælum beint til viðskiptavina að fara almennt sparlega með vatnið. Nægt vatn er á Vöglum í Hörgárdal en því vatni þarf hins vegar að dæla í bæinn með ærnum tilkostnaði og því full ástæða til þess að komast hjá miklum dælingum í lengstu lög. Þá vilja forsvarsmenn Norðuroku einnig benda á að þessa dagana er unnið að endurbótum á hluta af Sellandslindum og því er ekki að koma eins mikið vatn þaðan eins og annars væri.
Einnig er unnið að endurbótum á Garðsvíkurlindum ofan við bæinn Garðsvík á Svalbarðsströnd sem þjónar vatnsveitu Norðurorku í Svalbarðsstrandarhreppi. Undanfarnar vikur hefur verið unnið að endurbótum á hluta lindarsvæðisins. Verið er að endurvirkja lindir á suðurhluta svæðisins með það að markmiði að lindirnar séu öruggari, auk þess sem næst í eitthvað meira vatn en áður.
Líkt og aðrar náttúrulegar lindir á vinnslusvæðum Norðurorku hafa lindirnar í Garðsvík gefið nokkuð eftir í þurrkatíðinni undanfarnar vikur og sama á við um svonefnd Halllandsból sem eru sunnar í Vaðlaheiði. Hefur því verið óskað eftir því við notendur í Svalbarðsstrandarhreppi að þeir gæti að vatnsnotkun sinni og fari sparlega með vatnið, er fram kemur á vef Norðurorku.
Nýjast
-
Bakþankar bæjarfulltrúa Í guðanna bænum
Ég er enn í sjokki. Taugaáfalli. Og tilefnið, Jú, í gær varð ég barni að bana – næstum því. Veit ekki enn hvaða kraftaverk kom í veg fyrir þá miklu óhamingju. Öskur eða eitthvað sem undirmeðvitundin skynjaði - þótt augað sæi ekki. Tildrögin. Ég var að koma niður Krákustíg hjá Amtsbókasafninu þegar eitthvað skaust á örskotshraða fyrir steyptan garðvegginn, niður gangstéttina með fram Oddeyrargötu. -
Að efla þéttbýli eða vinna gegn því
Á síðustu 20 árum hefur íbúum á Íslandi fjölgað um tæp 100 þúsund eða um þriðjung (33%). Langstærstur hluti þessar fjölgunar hefur átt sér stað á suðvesturhorni landsins. Ef skoðuð er íbúaþróun í þeim sveitarfélögum sem í dag mynda sveitarfélagið Þingeyjarsveit, en voru fyrir aldarfjórðung 6 hreppir, kemur upp ólík mynd. Þann 1. janúar 2005 töldu sveitarfélögin (þá þrjú) 1.399 manns en þann 1. janúar sl. bjuggu 1.453 Þingeyjarsveit. Því hefur íbúum fjölgað hér um tæp 4% á sama tíma og landsmönnum fjölgaði um þriðjung. -
Framkvæmdasjóður ferðamannastaða Verkefni í Glerárdal og Hlíðarfjalli fá 46 milljónir
Tveir styrkir komu í hlut Akureyrarbæjar við úthlutun úr Framkvæmdasjóði ferðamanna, samtals um 46 milljónir króna. -
GeoSilica hefur framleiðslu á Þeistareykjum
GeoSilica færir út kvíarnar og hefur starfsemi í nýju húsi á fjölnýtingarlóð Landsvirkjunar á Þeistareykjum komandi haust. Fyrirtækið hefur samið við Landsvirkjun um leigu á húsinu, afhendingu auðlindastrauma á Þeistareykjum og samstarf til næstu áraSamstarfið markar upphaf fjölnýtingar á Þeistareykjum til framtíðar. -
Bjargvættir framtíðarinnar á Húsavík
Unglingadeild Björgunarsveitarinnar Garðars er afar öflug -
Rausnarleg gjöf frá nemendum Síðuskóla til barnadeildar SAk
Barnadeild Sjúkrahússins á Akureyri fékk á dögunum einstaka gjöf þegar nemendur í 5., 6. og 7. bekk Síðuskóla ákváðu að leggja 550.000 krónur inn á styrktarreikning deildarinnar. Upphæðin safnaðist með sölu á handverki og veitingum sem nemendur stóðu fyrir á Barnamenningarhátíð í apríl. -
Metár umsókna við Háskólann á Akureyri
Umsóknir í Háskólann á Akureyri hafa aldrei í sögu skólans verið fleiri, en alls bárust um 2.340 umsóknir að þessu sinni. Þetta er um 15% aukning frá síðasta ári og rúmlega 8% aukning frá árinu 2018, sem var fyrra metár umsókna við háskólann. -
Kjarnafæði Norðlenska kaupa B Jensen
Kjarnafæði Norðlenska gekk frá kaupum á sláturhúsi, kjötvinnslu og verslun B. Jensen í seinustu viku. -
Framkvæmdir að hefjast við nýtt svæði á Torfunefsbryggju Samið um fyrstu bygginguna
Samningur milli HN og verktakafyrirtækisins Húsheildar/Hyrnu um byggingu fyrsta hússins á Torfunefssvæðinu hefur verið undirritaður og markar ákveðin skref í uppbyggingu svæðisins.
