Ný ljóðabók eftir Stefán Þór
Út er komin ljóðabókin Mar eftir Stefán Þór Sæmundsson. Bókin er að mörgu leyti framhalds- eða systurbók Upprisu sem Tindur gaf út vorið 2019 og vakti talsverða athygli. Ljóð Stefáns eru fjölbreytt að efni og formi, stundum meitluð í bragarhætti en iðulega er byggingin frjálsleg eða tilraunakennd. Ljóðin í Mar eru öll samin á síðasta ári.
Í tilkynningu segir að þau fjalli um hyldjúpan sársauka og botnlausa fíkn, mölbrotna sjálfsmynd og hreina sturlun. En þarna séu líka ljúfsárar bernskumyndir, ísmeygileg ádeiluljóð þar sem glansmyndir samtímans koma við sögu, innlit í heim unga fólksins, fannbarðar náttúrulýsingar og léttsýrð gamankvæði. Stefán Þór kallar sig endurborið ungskáld. Hann þýddi fjölmargar bækur á yngri árum, t.d. Jurassic Park, gaf út bókina Hræring með súru slátri og var meðhöfundur bókarinnar Þeir vörðuðu veginn.
Auk þess birti hann fjölmarga pistla, smásögur og annað efni í dagblöðum og tímaritum og starfaði lengi sem blaðamaður. Stefán Þór er íslenskukennari við Menntaskólann á Akureyri og ljóðskáld á síðkvöldum. Bókin fæst hjá höfundi með því að senda á netfangið stefan@ma.is og von bráðar í verslunum Pennans Eymundsson.
Nokkur dæmi og brot úr bókinni:
Hér er hryggðarmynd negld niður með föstu formi og óvenjulegu rími:
Á gólfinu kisa hvæsir
klónum læsir í sófa.
Húkir móðir hryggðar
horfin dyggð með öllu
eymd í ásýnd blasir
enn er glas á borði
tíminn orðinn tómur
týndur rómur lífsins.
Og limra sem endurómar hið „geðveika“ og „truflaða“ úr slúðurdálkum fjölmiðla:
Það var alveg truflað hjá Tómasi
teboð með kökum og frómasi.
Þar athygli vakti
og úr öllum takti
geðveikur búlgarskur blómvasi.
Bernskumynd sem margir ættu að kannast við:
Þessar hlýju
hendur,
hrjúfi rómur,
neftóbak
og raspaðir
vangar.
Hér er janúarljóð, kuldaleg vetrarmynd í frjálsu formi:
Sólinni hrýs
hugur við
að skína
þegar vindurinn
feykir
ísköldum tjásum
upp af
fannbörðum
fjallatoppum.
Og titilljóð bókarinnar, Mar:
Eins og marblettur
á líkama
dofnar sorgin
nema ítrekað
sé reitt til höggs.
Auðmýktin
er fjólublá.
Undir niðri
ádráttur
um fölgula von.
Loks Meikóver:
Hún hristi af sér
flyðruorðið
og fór í megrun
allsherjar meikóver
og andlitsfegrun:
teygð öll og toguð
uns eggjandi langir
leggirnir urðu
og fitan öll soguð
úr framstæðum maga
en höggvið og sagað
af höku og nefi
í brjóstin var blásið
og bótox í hrukkur
en öllum til furðu
var bros hennar frosið.
Nýjast
-
Eik fasteignafélag vill byggja við Gleráreyrar
Á fundi skipulagsráðs Akureyrarbæjar í gær var tekin til umræðu tillaga frá Kollgátu, sem Ingólfur Guðmundsson og Andrea Sif Hilmarsdóttir kynntu f.h hönd Eikar fasteignafélags um uppbyggingu á lóðum 2-8 við Gleráreyrar og svæðis vestan þeirra. -
Sólarhringssund hjá Óðinskrökkum
Hið árlega sólarhringssund iðkenda í Óðni stendur nú sem hæst. Einn sundamaður syndir í einu og er þetta því nokkurs konar boðsund. -
Fékk ekki að lækka gjaldskrárhækkanir Orkuveitu Húsavíkur
Á fundi stjórnar Orkuveitu Húsavíkur í vikunni var tekin fyrir tillaga Valdimars Halldórssonar, varaformanns þess efnis að dregið yrði úr fyrirhuguðum gjaldskrárhækkunum en Valdimar taldi næga innistæðu fyrir hendi til að lækka umrædda hækkun -
Banaslys í Eyjafjarðarsveit
Alvarlegt umferðarslys varð á Eyjafjarðabraut eystri , skammt norðan við Laugaland skömmu eftir kl. 13:00 í dag. Þarna hafði bíll lent út af og voru tveir aðilar sem í honum voru úrskurðaðir látnir á vettvangi. Lögreglan á Norðurlandi eystra fer með rannsókn málsins og er hún á frumstigi og ekki frekari upplýsingar að hafa að sinni. -
Umferðarslys á Eyjafjarðarbraut eystri
Alvarlegt umferðarslys varð á Eyjafjarðabraut eystri , skammt norðan við Laugaland skömmu eftir kl. 13:00 í dag. Þarna hafði bíll lent út af og í honum voru tveir aðilar. Rannsókn á tildrögum slyssins stendur yfir á vettvangi og getur lögreglan ekki veitt frekari upplýsingar á þessu stigi málsins. -
Kirkjutröppurnar og gangstétt í Listagilinu
Framkvæmdir við kirkjutröppurnar eru hafnar að nýju eftir talsvert hlé og er búið að byggja yfir neðsta hluta trappanna, en þar er verið að vinna í húsnæði sem er undir tröppunum. Að því loknu verður hægt að hefja vinnu við sjálfar kirkjutröppurnar, þeirri vinnu hefur seinkað m.a. sökum þess að erfiðlega gekk að fá verktaka í verkefnið og það var umfangsmeira en var ráð fyrir gert. -
Hefur allt sem þarf
Fyrstu kynni mín af Höllu Tómasdóttur voru í tengslum við vinnustað þar sem hún kom einn dag og ræddi við hópinn. Þessi dagur breytti svolítið lífi mínu því þarna uppgötvaði ég í raun hvernig ég get tekið stjórn á eigin lífi. Halla varpaði á skjá mynd af vatnsglasi sem í var vökvi um það bil að miðju glasi. Hún talaði um viðhorf okkar og hvernig við tökumst á við það sem lífið færir okkur. -
Söngveisla í Glerárkirkju á sumardaginn fyrsta
Tíunda kóramót eldri borgara á Norðurlandi fer fram á morgun sumardaginn fyrsta. Fyrsta kóramót eldri borgara var haldið á Húsavík á lokadaginn 11 maí 2002 með þátttöku fimm kóra sem komu frá Húsavík, Akureyri, Dalvík, og Hrísey, Siglufirði og Skagafirði. -
Samherji og Ice Fresh Seafood á stærstu sjávarútvegssýningu heims
Alþjóðlega sjávarútvegssýningin Seafood Expo Global í Barcelona á Spáni opnaði í gær, 23. apríl. Sýningin er sú stærsta sinnar tegundar í heiminum á sviði veiða, vinnslu og sölu sjávarafurða. Samherji og Ice Fresh Seafood eru að venju með stóran og vel útbúinn bás, þar sem tekið er á móti gestum frá öllum heimshlutum og afurðir kynntar. Ice Fresh Seafood sér um að selja afurðir Samherja og fleiri fyrirtækja.
Athugasemdir