Nýárskveðja frá bæjarstjóra Akureyrar
Miðgarðakirkja í Grímsey. Mynd: Einar Guðmann/akureyri.is
Ásthildur Sturludóttir, bæjarstjóri, óskar lesendum gleðilegrar hátíðar og farsældar á komandi ári með þökk fyrir árið sem er að líða.
Gleðilega hátíð,
Þegar ég lít yfir árið sem er að líða, finnst mér eins og við séum á ýmsan hátt að upplifa endurtekið efni: Jörð skelfur að nýju á Reykjanesi, heimsfaraldur Covid-19 er í hæstu hæðum og öll okkar daglegu störf gerast nú enn eina ferðina þung í vöfum.
Í bráðum tvö ár höfum við búið við alls kyns höft og takmarkanir. Við höfum þurft að nota maska, hanska, spritt og ástunda strangar sóttvarnir. Það hefur verið erfitt en við sjáum þó alltaf nýjan leik í stöðunni og vonandi eygjum við senn ljósið við enda ganganna.
Hæfni fólks til að laga sig að breytingum, nýta þær sér til framdráttar og sjá tækifærin í þröngri stöðu, fleytir því áfram veginn og tryggir afkomu þess. Breytingar eru lykillinn að framþróun.
Á tímum faraldursins höfum við séð hversu sveigjanlegur vinnumarkaðurinn getur verið. Tækniframfarir hafa gert okkur kleift að laga okkur að breyttum aðstæðum: Fólk sinnir vinnu sinni að heiman og störf án staðsetningar eru nýr og spennandi veruleiki.
***
Árið hefur sannarlega einkennst af þrengingum í rekstri sveitarfélagsins og var fjárhagsáætlun Akureyrarbæjar afgreidd úr bæjarstjórn með 624 milljóna króna halla. Hins vegar er gert ráð fyrir batnandi afkomu og að við verðum komin aftur á réttan kjöl árið 2023 gangi áætlanir eftir.
Heimsfaraldurinn hefur sett okkur ákveðnar skorður en þrátt fyrir það hefur starfsfólkið fundið þær lausnir sem þarf, haldið uppi kraftmiklu starfi á öllum sviðum og komið í veg fyrir að veiran kafsigldi skútuna í kröppum sjó. Starfsfólk Akureyrarbæjar hefur sýnt að það getur lagað sig að breyttum aðstæðum og sér ný tækifæri í breytingunum.
Ýmsu hefur verið áorkað. Við opnuðum nýjan leikskóla, Klappir við Glerárskóla, lokið var við fyrri áfanga mikilla endurbóta á Lundarskóla, við hófum að innrita 12 mánaða börn í leikskóla, tókum í notkun nýtt aðstöðuhús siglingaklúbbsins Nökkva, lögðum ljósleiðara yfir sundið til Hríseyjar, skipulögðum nýtt Holtahverfi og Móahverfi, og samþykktum viðamiklar breytingar á stjórnsýslu Akureyrarbæjar sem fela m.a. í sér einföldun á skipulagi og sameiningar sviða. Hér eru aðeins nefnd nokkur atriði sem þó varpa skýru ljósi á þann mikla kraft sem býr í sveitarfélaginu okkar.
Og óneitanlega gleður það mjög, þótt það komi varla mjög á óvart, að íbúum Akureyrar fjölgaði verulega á árinu sem er að líða, enda er gott að búa á Akureyri. Hér blómstrar menningarlífið sem aldrei fyrr og íþróttafólkið okkar skarar fram úr á ýmsum sviðum. Akureyri er gott samfélag sem gerir fólki kleift að þroska hæfileika sína, ná skrefinu lengra og blómstra.
***
Einhvern tímann heyrði ég sagt að til væru tvenns konar fyrirtæki; þau sem hverfa og hin sem breytast. Og á þetta ekki við um öll lifandi kerfi, jafnvel manneskjuna sjálfa? Ef fólk breytist ekki og þroskast þá lifir það varla lengur. Og hið sama má segja um stofnanir og stór sveitarfélög. Við þurfum sífellt að vera vakandi fyrir því sem betur má fara, því sem þarf að breyta, og við þurfum að kunna að halda sjó við breyttar aðstæður.
Fyrir utan þann miska sem kórónuveiran hefur valdið okkur á því ári sem nú er brátt á enda, þá urðum við fyrir ýmsum öðrum skakkaföllum og sárast þótti mér þegar Miðgarðakirkja í Grímsey brann til grunna 21. september. Það var mikið áfall en hefur þjappað íbúum eyjarinnar enn betur saman og allt útlit er fyrir að innan tíðar rísi ný kirkja á grunni hinnar gömlu sem er ákaflega gleðilegt.
Bráðum eru liðin tvö ár síðan kórónuveiran skaut upp kollinum á Íslandi. Fyrirsjáanleiki er enginn, það er snúið að gera áætlanir til lengri tíma, en það sem mun halda okkur á floti og bera okkur inn í bjartari framtíð, er hæfni okkar til að laga okkur að breyttum aðstæðum og mæta erfiðleikum með djörfung og þor.
Lát ei kúgast þanka þinn
þá er efni vandast.
Þú skalt fljúga á forlögin,
fella þau og standast.
Þannig orti rímnaskáldið Sigurður Breiðfjörð forðum daga og við skulum gera þessi orð að okkar. Mætum nýju ári með reynsluna í farangrinum og brjóstið fullt af trú, von og kærleika.
Ég óska ykkur öllum gleðilegs nýs árs og vona að nýtt ár færi ykkur velsæld og hamingju.
Ásthildur Sturludóttir,
bæjarstjóri á Akureyri
Nýjast
-
Kirkjutröppurnar og gangstétt í Listagilinu
Framkvæmdir við kirkjutröppurnar eru hafnar að nýju eftir talsvert hlé og er búið að byggja yfir neðsta hluta trappanna, en þar er verið að vinna í húsnæði sem er undir tröppunum. Að því loknu verður hægt að hefja vinnu við sjálfar kirkjutröppurnar, þeirri vinnu hefur seinkað m.a. sökum þess að erfiðlega gekk að fá verktaka í verkefnið og það var umfangsmeira en var ráð fyrir gert. -
Hefur allt sem þarf
Fyrstu kynni mín af Höllu Tómasdóttur voru í tengslum við vinnustað þar sem hún kom einn dag og ræddi við hópinn. Þessi dagur breytti svolítið lífi mínu því þarna uppgötvaði ég í raun hvernig ég get tekið stjórn á eigin lífi. Halla varpaði á skjá mynd af vatnsglasi sem í var vökvi um það bil að miðju glasi. Hún talaði um viðhorf okkar og hvernig við tökumst á við það sem lífið færir okkur. -
Söngveisla í Glerárkirkju á sumardaginn fyrsta
Tíunda kóramót eldri borgara á Norðurlandi fer fram á morgun sumardaginn fyrsta. Fyrsta kóramót eldri borgara var haldið á Húsavík á lokadaginn 11 maí 2002 með þátttöku fimm kóra sem komu frá Húsavík, Akureyri, Dalvík, og Hrísey, Siglufirði og Skagafirði. -
Samherji og Ice Fresh Seafood á stærstu sjávarútvegssýningu heims
Alþjóðlega sjávarútvegssýningin Seafood Expo Global í Barcelona á Spáni opnaði í gær, 23. apríl. Sýningin er sú stærsta sinnar tegundar í heiminum á sviði veiða, vinnslu og sölu sjávarafurða. Samherji og Ice Fresh Seafood eru að venju með stóran og vel útbúinn bás, þar sem tekið er á móti gestum frá öllum heimshlutum og afurðir kynntar. Ice Fresh Seafood sér um að selja afurðir Samherja og fleiri fyrirtækja. -
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt.
Athugasemdir