Vikublaðið Þeyr | Grundarfjörður | Snæfellsnes

Framvegis verða fundir fyrsta þriðjudag hvers mánaðar kl 17:00 í Verkalýðshúsinu.

Nýlega er lokið hinni hefðbundnu krabbameinsskoðun kvenna á Snæfellsnesi og í hana mættu töluvert færri konur en í slíka skoðun hér í Grundarfirði. Eins og komið hefur fram áður, þá var skoðunarstað breitt m.a. vegna kreppunnar og hinna nýju tækja sem eru mjög viðkvæm og erfið í flutningi. Samdóma álit þeirra sem tóku þátt í skoðuninni er að öll aðstaða hafi verið mjög góð, svo og viðmót starfsfólks. Hér sendum við í félaginu áskorun til allra kvenna og heimilismanna að mæta í slíka skoðun sem fyrst ef það hefur farist fyrir hingað til. Staðreyndin er sú að af þeim fimm krabbameinum sem greindust hér  í brjóstum undanfarin ár voru það fjögur sem konurnar fundu sjálfar með reglulegri skoðun (mánaðarlega eftir blæðingar). Á árinu sem er að líða hafa þrír greinst með krabbamein af ýmsum gerðum, sem er álíka og meðtal landsins.

Á sunnudaginn 25. okt. var kynning á starfsemi félaga sem starfa í Grundarfirði. 18 félög af 22 sem fundust tóku þátt og yfir 100 manns mættu í Samkomuhúsið og röðuðu sér hringinn í salnum og tóku á móti gestum. Kvenfélagið Gleym mér ei stóð fyrir kynningunni og seldi kaffi og vöfflur til ágóða fyrir Lúðrasveitina sem er á leið á mót í Vestmannaeyjum í vor. Margir heimamenn voru að heiman svo við megum vel við una.

Árlega er efnt til svokallaðrar vímuvarna-viku með það að markmiði að vekja athygli landsmanna á mikilvægi forvarna, einkum forvörnum sem snúa að börnum og unglingum.   Verkefnið ber  yfirskrift-ina Vika 43 og stendur að þessu sinni yfir dagana frá 18. október til 24. október.
Vel upplýstir foreldrar eru góð forvörn og mikilvægt er að foreldrar eigi gott samstarf  um vímuvarnir sín í milli og við skólann. Nú hafa verið stofnuð foreldrafélög
 við framhaldsskólana og þar starfa foreldraráð samkvæmt nýjum menntalögum. Forvarnarfulltrúar og náms- og starfsráðgjafar  í framhaldsskólum eru lykilfólk í samstarfi heimila og skóla um aldurshópinn 16 – 18 ára.
Foreldrar kannabisneytenda hafa lýst þeirri reynslu sinni að hafa grandalausir sofnað á verðinum og ekki þekkt þau einkenni sem koma fram við upphaf kannabisneyslu hjá ungu fólki. Hvernig byrgjum við brunninn?