Vikublaðið Þeyr | Grundarfjörður | Snæfellsnes

Nokkrir vaskir drengir í Slökkvilið Grundarfjarðar hafa tekið sig til og gert dagatal fyrir árið 2010. Þetta skemmtilega framtak er hugsað til fjáröflunar fyrir slökkviliðið á þessum erfiðu tímum og verður ágóðanum varið til kaupa á björgunarklippum, námskeiða fyrir slökkviliðsmenn og annarra verkefna til eflingar sveitarinnar. Dagatalið er til sölu í Gallerí Kind og einnig munu fyrirsæturnar ganga í hús á næstu dögum.  Myndin hér til hliðar er af herra nóvember. Dagatalið kostar 2.500 kr.

Föstudaginn 18. desember  brautskráði Fjölbrautaskóli Snæfellinga  12 nemendur,  alla með stúdentspróf.   Af  náttúrufræðibraut útskrifuðust  þau Hafdís Guðrún Benediktsdóttir og Njáll Gunnarsson.  Af  félagsfræðabraut útskrifuðust  þau Ágúst Ingi Guðmundsson, Ása Gunnarsdóttir, Gunnhildur Gunnarsdóttir, Magnús Már Leifsson, Maria Joao de Jesus Neves, Ólöf  Rut Halldórsdóttir, Steinunn Alva Lárusdóttur og Unnur Lára Ásgeirsdóttir. Tveir nemendur útskrifuðust með viðbótarnám til stúdentprófs þau Edda Baldursdóttir og Tómas Freyr Kristjánsson.

Bæjarstjórn Grundarfjarðar hefur sent frá sér ályktun og mótmælis fyrirhuguðum niðurskurði hjá embætti Sýslumanns Snæfellsinga.

 

 „Bæjarstjórn Grundarfjarðar  lýsir þungum áhyggjum af boðuðum niðurskurði  hjá  Sýslumanni Snæfellinga.   Bæjarstjórnin  ítrekar fyrri ályktanir og mótmælir því að niðurskurður á þjónustu hins opinbera skuli fyrst og fremst verða á landsbyggðinni.  

Bæjarstjórn Grundarfjarðar mótmælir harðlega ákvörðun um lokun umboðsskrifstofu sýslumannsembættisins í Grundarfirði  frá áramótum  og telur að ákvörðunin sé ekki byggð á faglegum forsendum heldur sé um tilviljanakennda ákvörðun að ræða. Dagleg opnun umboðsskrifstofunnar í Grundarfirði hefur mælst mjög vel fyrir og verið vel nýtt af íbúum í fjölbreyttum erindagjörðum. Lokun skrifstofunnar ýtir sparnaði embættisins yfir á almenna íbúa í Grundarfirði og eykur kostnað þeirra. Bæjarstjórnin skorar á sýslumann að endurskoða þessa ákvörðun með hliðsjón af þörfum og  þjónustu við íbúa.

Nýendurvakinn Leikklúbbur Grundarfjarðar frumsýnir annað kvöld fyrsta stykkið sem sett verður upp og heitir það Aðfangadagur á háaloftinu. Sýningar verða fjórar eins og sagt var frá í síðustu viku hér á vefnum. Myndina tók Gunnar Kristjánsson á æfingu klúbbsins nú á dögunum.