Vikublaðið Þeyr | Grundarfjörður | Snæfellsnes

Á skemmtilegum íbúafundi sem Kvarnir stóð fyrir í samvinnu við Grundarfjarðarbæ, um „Hamingju í heimabyggð“  kom fram sterk ósk um einhverskonar „samfélagsmiðstöð“. Hugmyndin byggir á því að koma upp aðstöðu fyrir fjölbreytt tómstundastarf. Í framhaldinu hef ég skoðað hvaða möguleikar væru raunverulegir í þeim efnum. Niðurstaðan af þeim vangaveltum er sú að vert sé að gera tilraun. Tilraun sem átt getur möguleika mundi fela í sér að stofnað yrði tómstundafélag einstaklinga og félagasamtaka þar sem hver meðlimur greiddi félagsgjald mánaðarlega. Upphæð félagsgjalds yrði við það miðuð að geta staðið undir leigu og rekstri á hentugu húsnæði. Slíkt húsnæði er til staðar þar sem verslunin Hamrar var til húsa. Það húsnæði gefur marga möguleika sökum fjölbreytni þeirra rýma sem þar eru. Þar má hugsa sér fjölbreyttar vinnustofur, gallerí og samkomusal. Þarna má gera ráð fyrir að hafa reglulegan opnunartíma sem félagar skiptu með sér, þar sem mjög fjölbreytt starfsemi yrði víða í húsinu. Svo má hugsa sér að hópar eða einstaklingar geti verið með afmarkaða starfsemi utan þessa tíma.

Það var í febrúarmánuði sem ég skrifaði grein um hugmynd mína og margra annarra á Snæfellsnesi um möguleika á að hanna nýja gönguleið eftir Snæfellsnesfjallgarðinum, frá Ljósufjöllum og vestur að Snæfellsjökli. Síðan þá, hef ég fengið margar fyrirspurnir frá áhugasömu fólki um þetta málefni og greinilegt er, að margir sem stunda útivist og ekki síst þeir sem stunda ferðaþjónustu á svæðinu, vilja fylgjast með og huga að því, að bæta þessum þætti inn í ferðaþjónustu sína á styrkjandi hátt. Þess vegna hef ég ákveðið, ásamt fleirum áhugasömum aðilum, m.a. Ferðafélagi Íslands og markaðsstjóra Grundarfjarðarbæjar, að halda kynningarfund um þetta málefni í Sögumiðstöðinni í Grundarfirði, þann 14. apríl. kl. 20. Og eru áhugasamir hvattir til að mæta.

Kveðja úr Grundarfirði. Gunnar Njálsson