| Viltu vera víkingur í sumar? |
| Senn hefjast komur skemmtiferðaskipa til Grundarfjarðar. Undanfarin ár hefur vel verið tekið á móti farþegum þeirra og í sumar verður engin undantekning þar á. Fyrsta skipið kemur 22. maí og það síðasta 6. september, en þau eru alls 13 talsins. Nú leitum við að opnum og hressum aðilum til að manna móttökuhópinn víðfræga sem starfað hefur undanfarin tvö ár. Ertu á aldrinum 16-25 ára, og til í að taka þátt í skemmtilegu og gefandi starfi? Ekki sakar að geta sungið eða spilað á hljóðfæri en það er þó ekki skilyrði. Vinnan er launuð. |
| Nánar... |
Þessi vefur er prófaður og vottaður
samkvæmt alþjóðlegum stöðlum.
Útskrift hjá FSN
Þriðjudagur, 22 Desember 2009 00:03 | Skrifað af Innsendar greinar | 
Föstudaginn 18. desember brautskráði Fjölbrautaskóli Snæfellinga 12 nemendur, alla með stúdentspróf. Af náttúrufræðibraut útskrifuðust þau Hafdís Guðrún Benediktsdóttir og Njáll Gunnarsson. Af félagsfræðabraut útskrifuðust þau Ágúst Ingi Guðmundsson, Ása Gunnarsdóttir, Gunnhildur Gunnarsdóttir, Magnús Már Leifsson, Maria Joao de Jesus Neves, Ólöf Rut Halldórsdóttir, Steinunn Alva Lárusdóttur og Unnur Lára Ásgeirsdóttir. Tveir nemendur útskrifuðust með viðbótarnám til stúdentprófs þau Edda Baldursdóttir og Tómas Freyr Kristjánsson.
Hæstu einkunn á stúdentsprófi hlaut Maria Joao de Jesus Neves og fékk hún veglega bókagjöf gefna af Snæfellsbæ. Maria Joao hlut einnig verðlaun fyrir góðan árangur í félagsfræði og sálfræði, gefin af Snæfellsbæ og Stykkishólmsbæ. Fyrir góðan árangur í sagnfræði fékk Ólöf Rut Halldórsdóttir verðlaun, gefin af Snæfellsbæ. Edda Baldursdóttir hlaut verðlaun fyrir góðan árangur í Sálfræði gefin af Gámaþjónustu Vesturlands. Fyrir góðan árangur í líffræði fékk Njáll Gunnarsson verðlaun og voru þau gefin af Náttúrustofu Stykkishólms.
Einnig fékk Magnús Már Leifsson viðurkenningu fyrir störf sín í þágu nemendafélagsins gefin af Fjölbrautaskóla Snæfellinga.
Útskriftarathöfnin hófst á því að Ólöf Rut Halldórsdóttir, útskriftarnemi, og Sylvía Ösp Símonardóttir, nemandi í FSN, fluttu nokkur jólalög á flygil og þverflautu. Skólameistari Fjölbrautaskóla Snæfellinga, Skúlína Hlíf Kjartansdóttir, brautskráði nemendur og flutti síðan ávarp. Næst afhenti Pétur Ingi Guðmundsson, aðstoðarskólameistari verðlaun fyrir góðan námsárangur. Nýstúdentinn Ólöf Rut Halldórsdóttir flutti síðan jazz-lagið „Round Midnight“, við undirleik Sylvíu Aspar Símonardóttur Hreinn Þorkelsson, kennari við skólann kvaddi síðan nemendur fyrir hönd starfsfólks. Áður en þessari hátíðlegu athöfn lauk flutti síðan nýstúdentinn Magnús Már Leifsson ræðu fyrir hönd nýstúdenta og kvaddi þar með skólann og starfsfólkið fyrir þeirra hönd. Að dagskrá lokinni sleit skólameistari skólaárinu og bauð upp á kaffiveitingar í boði Fjölbrautaskóla Snæfellinga.
