Vikublaðið Þeyr | Grundarfjörður | Snæfellsnes

Ályktun frá Félagi leikskólakennara

Á fundi stjórnar Félags leikskólakennara þann 9. desember 2009 voru til umræðu efnahagsmál þjóðarinnar og áhrif niðurskurðar í leikskólum á gæði leikskólastarfs og menntun leikskólabarna.

Eftirfarandi ályktun var samþykkt:

Stjórn Félags leikskólakennara telur að nú þegar hafi mörg sveitarfélög og rekstraraðilar leikskóla gengið eins langt og mögulegt er í niðurskurði í leikskólastarfi og að mál sé að linni. Leikskólar nutu ekki góðærisins nema að mjög takmörkuðu leyti. Þvert á móti bitnaði það á leikskólastarfi með þeim hætti að víða gekk illa að ráða starfsfólk vegna þenslu og samkeppni á vinnumarkaði og þar af leiðandi voru margir skólar ekki fullsetnir svo mánuðum skipti. Þetta ástand hafði um árabil mikil áhrif á starfsemi skólanna, meðal annars jókst álag á stjórnendur og annað starfsfólk. Ástandið hafði ekki síður áhrif á börn og foreldra þeirra, til dæmis þegar þurfti að skerða dvalartíma barna og inntaka nýrra nemenda dróst.

Þegar loks tekst að ráða starfsfólk og koma starfsemi í jafnvægi fer í hönd blóðugur niðurskurður, sums staðar svo mikill að faglegt starf er í hættu. Þetta mun hafa mikil áhrif á menntun og umönnun leikskólabarna enda hafa talsmenn foreldra víða stigið fram og lýst óánægju sinni og áhyggjum.

Stjórn Félags leikskólakennara skorar á sveitarfélög og aðra rekstraraðila að láta nú þegar staðar numið í niðurskurði í leikskólum og annars staðar í skólakerfinu og standa við fögur fyrirheit um að slá skjaldborg um menntun barna og ungmenna. Það er mikill tvískinnungur að skera niður í stórum stíl og ætlast um leið til þess að starfsfólk haldi uppi sömu gæðum og þjónustu og áður. Þegar þrengir að í samfélaginu er öruggt og öflugt skólakerfi ein mikilvægasta stoðin til að tryggja börnum góða menntun, umönnun og skjól. Það er réttlætismál að forgangsraða í þágu þeirra þegar kemur að fjárhagsáætlanagerð.

Reykjavík, 9. desember 2009

F.h. stjórnar Félags leikskólakennara

Björg Bjarnadóttir formaður